الجمعة , مارس 29 2024
سيدة سعودية

مطلقة يعني مستعمله يابني ..

بقلم جهاد التابعى .

عمرك سألت نفسك وجاوبت بصراحه .. ليه الراجل الشرقي بيترعب من الإرتباط بواحده مطلقه أو واحده كان عندها علاقات في حياتها من أي نوع ؟

لو هتجاوب الإجابه التقليديه .. أصل دي أول بخته و بلا بلا بلا
وأصل اللي عندها علاقات دي معندهاش أخلاق ومش مضمونه .. يبقي أرجوك تركن علي جنب شويه عشان احنا عايزين نعرف السبب الحقيقي، اللي الناس بتتكسف تقوله وبتستبدله بأسباب محفوظه ومثاليه.
من فتره قصيره صديقة فيسبوكيه بعتتلي تسألني ليه الراجل بيتردد في الجواز من مطلقه؟ وطلبت مني أكتب السؤال ده علي بروفايلي..
واستغربت جدا لما قريت ردود الناس قد ايه مثاليه وقد ايه كلهم معندهمش أي مشاكل في الموضوع ده ومعندهمش مانع يتجوزوا مطلقة لو حبوها حب صادق ونبيل وكل الإكليشيهات اللي أنتوا عارفينها وغالبا بتقولوها دي، لكن عدد من نفس الناس دول بعتلي رسايل خاصه فيها إجابات حقيقيه غير التمثيل اللي انكتب علي السؤال، وأنا مش هعمل زيهم وأخبيها عليكوا

العروسه الخبرة

– أول وأهم سبب هو الخوف من المقارنه (تحذير السبب ده فوق ال ٣٥ )
عادة الراجل المصري بيتباهي بفحولته الجنسيه طول الوقت، وعنده وهم عميق إنه شايل جوه أعضائه التناسليه سر الفراعنه العظيم، اللي معتقد برده إن السياح بيجوا مخصوص عشانه، وعادة كمان بيربط العنتيل المصري بين حجم الأعضاء دي ومدي رجولته، ثقافة أحمد التباع دي مش محصوره علي الطبقات الجاهله بس، لاء عادي جدا إنك تلاقي حد متعلم كويس ويبدو مثقف بيتباهي برده بحجم مدخراته الذكورية، حتي لو كدب، وغالبا بتبقي كدب، بتبقي أسطوره عملها الراجل لنفسه عشان يثبت لنفسه إنه لا مؤاخذه جامد، عشان كده النوع ده من الرجاله بيبقي حريص جدا إنه يتجوز واحده متعرفش الألف من كوز الدرة بمعني الكلمه، أو عالأقل تديله الإحساس ده، عشان متكتشفش إن عنده مجموعة أمراض جنسيه وسرعة قذف وبلاوي زرقا، ويقنعها إن اللي بيعمله ده هو المثالي وإن كل الناس كده عادي وإنه زي الفل، وهي لو متعرفش.. إحتمال تصدق مبدئيا بالرغم من إنها أكيد هتحس إن في حاجه غلط مع الوقت، بس مش مهم هو مطمن إنها مش هتسأله أبدا ومش هتطلب منه يعدل من نفسه أو يتغير أو يتعالج عشان هو مختارها متربيه إن الكلام في الحاجات دي أصلا عيب
ولازم لازم لازم تبقي قطه مغمضه وفي أقوال أخري جاهله .. هو أنت لو قلت لواحد ساذج إن التفاح اسمه موز هيعترض؟
لكن المطلقه أو اللي كان عندها علاقه إحتمال كبير تبقي فاهمه أو تقارن، وإحتمال جوزها الأولاني يكون أرجل منه بمقاييسه اللي هو حطها لنفسه
وعموما الرجاله اللي بيخافوا من المقارنه مش هيسلموا منها حتي مع القطه المغمضه لأنها يوما ما هتقارنك بفطرتها وبإحساسها، وبجاركوا اللي بيتقابلوا صدفه في الأسانسير، والموضوع ممكن يقلب مقارنه وفضول كمان وألبس يامعلم
كمان في تفسير منطقي بالنسبالي طرحته دكتوره نوال السعداوي في كتابها المرأة والجنس أعتقد إنه هيهزلك الأسطوره المتعلقه بحجم مدخراتك، الفكره إن الأجزاء العميقه من مهبل ورحم المرأه الإحساس فيها أقل من السطح الخارجي لأن الأماكن دي مهيأه للتمدد أثناء الولاده، يعني العمق لا مؤاخذه مش ميزه في الحالات دي !

العروسه الكنبة

السبب التاني ” موافقة الأهل”
وده جزء كبير منه اقتصادي، عادة أم المحروس بتبقي بتفكر ” معقوله ندفع دم قلبنا في مصاريف الجواز عشان الواد ياخد واحده مستعمله، ما أجيبله واحده جديده أحسن” وبتبقي بتردد لإبنها جمل من نوعية ” لو فيها الخير ما رماها الطير”، دي المطلقه خرج بيت يابني” والغريب في الموضوع إن الأم دي نفسها ممكن تبقي مطلقه أو عندها بنت مطلقه هتموووت وتجوزها ومستغربه محدش بيوافق يتجوزها ليه!!
بس المشكله دي بيبقي حلها عادة إن الراجل يكون مستقل ماديا عن أهله تماما، ساعتها الإعتراض هيبقي مجرد رأي أو تحذير بسيط، لكن طول ماأهلك هما اللي شارينلك السرير يا شاطر يبقي من حقهم ينقولك اللي هتنام جنبك عليه!

العروسه الأرنبة

السبب التالت ليه علاقه بتعامل الراجل مع المرأة علي إنها أرنبة، يعني بيعد يحسبها ويفكر في عدد السنين اللي باقيالها عشان تخلف وتنتج !
وده هتلاقي أمه بتقول بمنتهي الإستنكار لو العروسه مخلفه قبل كده، يعني هيربي ولاد واحد غيره ! هو ذنبه ايه؟ طب مش احنا يا حاجه مجتمع متدين بطبعه وابنك متدين هو كمان؟ وإنه يربي طفل يتيم أو معرض للتشرد ده ثواب، وإنه يؤثره علي نفسه ده من صفات المحسنين. هو الكلام المثالي ده كله بيتبخر لما يبقي الموضوع شخصي ولا ايه!!

العروسه الزبديه !

في ناس كتير بتتعامل مع الست المطلقة علي إنها علبة زبادي في حد فتح غلافها وخد منها معلقه وزمانها حمضت !
عاده هم نفسهم الناس اللي بيبقوا بيقنعوا البنات بالحجاب عن طريق المثل السطحي بتاع البونبونايه المتغلفه، فبالنسبالهم هي سلعه لازم تتغلف، وسلعه استهلاكيه لو حد خد منها لحسه هتقل وتتلوث، وكمان بنفس منطق علبة الزبادي اللي اتفتحت، واللي الغطا هو الدليل الوحيد علي جودتها، يسألنا سبع البرومبه الناصح، وأنا إيش ضمني بقي إنها بعد ما اتطلقت معملتش علاقات كتير غير جوزها، ماهي كده كده مش عذراء!
طب وأنت إيش ضمنك برده إن مراتك كمان مبتعملش علاقات ماهي كده كده مش عذراء برده والبعبع اتشال! ولا مصيبه لتكون مراتك لسي عذراء !!
مش هقولك الجواز شركة العمر، ولازم تختار واحده ترتاح معاها وتناسبك وإن ده أهم من أي حاجه تانيه ولا هقولك إن ممكن واحده مطلقه أو عندها علاقه سابقه تكون بتحبك أكتر ألف مره وهتسعدك وتحافظ عليك أكتر من واحده أنت أول واحد في حياتها بس هسألك سؤال ..
مرسيدس ٢٠١٢ مستعمله ولا ١٢٨ جديده؟

شاهد أيضاً

يتساءل الجهلاء : أليس المحجبات مثل الراهبات؟

إسماعيل حسني الراهبة إنسانة ميتة، صلوا عليها صلاة الميت يوم رهبنتها رمزاً لمغادرتها العالم المادي، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.