الجمعة , مارس 29 2024
الكنيسة القبطية
رهبان دير وادى الريان

بالصور: حوار مع راهب من رهبان دير الأنبا مكاريوس يكشف حقيقة الأمور كاملة .

قام رامى كامل ومعه كلا من مينا نادى و وائل كمال احد النشطاء الأقباط  بأخذ قرار الذهاب الى دير الأنبا مكاريوس الريانى من اجل كشف حقيقة ما حدث ويحدث داخل الدير فكان هذا الحوار ..

س & ج مع راهب عجوز واليكم تفاصيل الحوار

تخترق سيارة صديقى دروب القاهرة لتصل الى ميدان الرماية فى تمام السابعة صباحا فنفطر على عربة الفول و نتبادل الحديث مع البائع وسائقى الميكروباصات ثم نعود للسيارة ونرتكن الى طريق الفيوم ونقطع المسافة مستقيمة حتى نصل ابشواى ومنها نتخذ طريق يوسف الصديق حتى نصل الى بوابة محمية وادى الريان
يقف شاب على بوابة المحمية حمدلله على السلامة الله يسلمك زيارة للمحمية


أكيد 11 جنية ليه ؟


رسوم 5 جنيه العربية و واتنين جنيه لكل فرد “كنا 3 افراد”
بعد الدفع تنطلق السبارة بين الوديان وعيون ماء كبيرة جدا ومناظر صحراوية خلابة اقل ما يقال عنها انها غاية الروعة و مشكلة الطريق ان الكثبان الرملية احيانا تقطع الطريق وغالبا ما تجد “لودر” المحمية يفتح الطريق للسيارات ونصيحة للسائق تخطى الرمال بسرعة حتى لا تغرز سيارتك
بعد مسافة تصطدم بان هناك قرية كاملة فى قلب المحمية تسمى قرية الولاء … اتحدث هنا عن قرية مثل باقى قرى الارياف وعلمت ان هناك ايضا قرية تسمى قرية سيدنا الخضر
بعد بضعة عشرات من الكيلومترات ظهر سور الدير “محور الازمة” وبعد قليل كنا امام البوابة وطلبنا مقابلة احد الاباء
كان الصديقان متعاطفان جدا مع رهبان دير وادى الريان اما انا فكان بداخلى اسئلة كثيرة متزاحمة وبمجرد ان مررنا من بوابة الدير وسط هولاء الرهبان البسطاء وعلى هذا الطريق الغير ممهد قابلنا هذا الاب الكبير فى السن البسيط فى الملبس صغير الجسم الزمن رسم على وجهه قسمات كثيرة وفيما يبدو انه يخجل بعض الشئ
دخلنا الى غرفة صغيرة لاستقبالنا و احضروا امامنا الماء و بالطبع ودعنا شبكة الهاتف منذ امد ليس بقليل وقبل اى شئ بادرت الرجل بأسالتى

– ازاى يا ابونا تعتدوا على محمية طبيعية ؟

– مين قال اننا بنعتدى على المحمية ؟

احنا هنا مقيمين قبل ما يتم اعلان المكان محمية طبيعية … اول مرة جينا هنا كان فى مشكلة بين ابونا متى المسكين و قداسة البابا كيرلس وخرج ابونا متى من الدير سنة 1960 مع بعض الرهبان ومشيوا مسافة كبيرة جدا جوه البرية لحد ما قابلوا راجل عرباوى اسمه عادل الاعور دلهم على عين المياه و مغارة قالهم ان عجائز العرب

كانوا بيحكوا ان دى كنيسة وبالفعل دخل ابونا متى المغارة لقاها كلها رمل وفضل هو والاباء ينضفوها بايديهم ايام طويلة لحد ما ظهر المذبح و كتابة على الحوائط باللغة القبطى البحيرى و اكتشفنا ان الكنيسة دى بناها القس الراهب مكاريوس السكندرى وكانت ضمن اربعة مناطق خدم فيهم مكاريوس السكندرى و عمرنا المكان من سنة 1960 لحد سنة 1969 وتم تصفية الخلاف مع البابا كيرلس و ابونا متى رجع ابو مقار الكبير


بعد سنين طويلة ابونا اليشع المقارى كلم ابونا متى وقاله نرجع المكان اللى فى وادى الريان وبالفعل سنة 1993 رجعنا للمكان هنا وكنا عدد قليل جدا ولقينا العربان حرقوا المغارة وجزء منها متهدم وسكنها العقارب والتعابين السامة وضوارى الجبل لكن نضفناها تانى و كتير كان العربان بيعملوا معانا مشاكل ويجوا يعتدوا على بالضرب والاهانات


سنة 1998 تم اعلان وادى الريان و وادى حيتان محميتين طبيعيتين ولقينا موظفيين البيئة كمان بينازعونا فى المكان


– ده طبيعى لانكم واضعين يدكم على أملاك الدولة والاملاك دى اصبحت محمية طبيعية … ولا ايه ؟


كلامك شكله صح لكن جوهره غلط لان مثلا العربان حاطين ايدهم على اراضى شاسعة فى المحمية وفى قرى كاملة جوه المحمية و العرب بيعتدوا بصورة دائمة على كافة الاملاك الموجودة فى المحمية وعامة موظفيين البيئة طلبوا نجيب تصريح بقاء فى المكان من وزيرة البيئة وبالفعل جبنا التصريح


– يعنى وافقوا على بقائكم فى المكان ؟
– اه وافقوا

– طيب ايه المشكلة ؟

 المشكلة اننا كنا بنفحت قلالى فى الجبل وده شئ صعب جدا فطلبنا من موظفيين البيئة بناء بعض القلالى قالوا لا افحتوا الجبل حتى سموا الدير فى الاوراق الرسمية الدير المنحوت او الدير المحفور ومع دخول بلوك البناء للدير كان العربان و موظفيين البيئة بيعتدوا علينا و وصل الامر لعشرات المحاضر من البيئة ومرات تم خطف الأخوة او العمال و ندفع للعربان فدية ومرة خطفوا العربية واتبهدلنا كتير عشان بناء الدير واعادة اعمار دير يعتبر اقدم دير فى مصر ان لم يكن فى العالم


يرضيك تشوف تراث اجدادك و تعمل مش شايفه او تغمض عينك عشان تسيبه يموت فى هدوء ومحدش يسأل فيه ؟ احنا بنعمر الدير و بنبنيه


– مقاطعا … بدون دخول فى المشكلة انا بدور على رد لاسألتى انتوا ازاى تدخلوا بلوك ابيض محمية طبيعية وتبنوا به؟


– حضرتك متحامل علينا جدا ومشحون بكلام كتير سمعته لأن فى ناس بتعرف توصلكم كلامهم لكن محدش سمع مننا ولا عايز يسمع … يا استاذ مبنى البيئة اتبنى بالبلوك الابيض و قرية الولاء و قرية الخضر و المبانى اللى حوالين العيون مش بس كرفانات زي ما بيقولوا لكن فى منها كتير مبنى بالبلوك لكن التبرير اللى بيردده الكل ان معكش تصريح , ده على اساس ان كنيسة سمالوط مكنش فيها تصريح اللى مش عارفين يبنوها وكل ورقها كامل من سنين .
– متخلطش الورق يا ابونا … لو تغاضينا عن مسألة البلوك انت ازاى تبنى سور حوالين الارض ؟ قولى ان ده مش

اعتداء على أملاك الدولة ؟

 نظر لى نظرة مدقق وقال … لو انت كنت هنا ايام ثورة 25 يناير كنت هتقدر ليه عملنا كده … المساجين لما هربوا من السجون يا استاذ دخلوا المحمية و لان المنطقة بتاعت الدير اثرية وفيها معبد فرعونى صغير ومعبد رومانى فالمساجين وبعض العربان كانوا بينقبوا عن الاثار و ده عرض حياة الرهبان للخطر لان اغراب بقوا بيدخلوا وفى فكرهم الشرير ان الرهبان دول عندهم اثار او يعرفوا طريق الاثار و الطامعين فى المال ممكن يقتلوا اى حد خاصة اننا فى صحراء وانفلات امنى فقررنا نحمى المنطقة لاننا عارفين انها اثرية و بنينا السور ولما جه قيادة من الجيش لهدم الصور وضحناله كل شئ وكان شخص محترم وقدر اللى عملناه وادى الدير ورهبانه حافظوا لمصر والكنيسة على اهم اثار

– عمال تتكلم على اثار فى المنطقة واثرية الدير هل عندك ما يثبت ان المكان اثرى ؟

 بغض النظر عن بيان الكنيسة الرسمى اللى اعترف ان الدير اثرى خلينا نشوف اللجنة المتخصصة اللى كان رئيسها الدكتور رجب محمد عبد السلام مدير عام الاثار فى مصر الوسطى ومعه تسعة من كبار المتخصصين و اللجنة دى رصدت 9 نقاط اثرية و بالمناسبة اوصت بعدم اقامة طرق او ترع او اى شئ من شأنه اختراق الدير ومحيطه و اللجنة كانت بتضم مسئول من البيئة واخر من القوات المسلحة وتم عمل خريطة كاملة للمكان
– عايز تفهمنى ان الاثار معاكم اومال الجيش والداخلية جم مع العمال لهدم السور واختراق الدير ليه ؟
– نظر بابتسامة خفيفة تدل على التمكن من منطقية ما يقول … شوف يا استاذ فى خطاء فى الجهاز الادارى مينفعش انا كدير اتحمل نتيجته ولما السادة جم هنا و نمنا قدام البلدوزر و قدرنا نوقف القرار بعد الكل ما اخلى ضهرنا وضحنا لسيادة المقدم الامر وخرجناله تقرير الاثار وبناء عليه هو كتب تقرير تانى قال فيه انه ظهر ان المنطقة اثرية و ان لجنة ايطالية ولجنة من الجامعة الامريكية ولجنة اخرى فرنسية ستعمل على الموقع و يتم ايقاف كافة الاعمال لحين انتهاء وزارة الاثار لعملها .. هو عرف اللجان لما كلم المسئولين

– انت عارف ان الطريق ده لتنمية مصر كلها و فى ضرورة لانه يتشق لتنمية منطقة الواحات ؟

 ومين فهم حضرتك اننا معترضين لكن احنا خايفين على الدير و اثريته و اقترحنا على السادة المسئولين مكانين اخرين المكان الول يوفر 33كم من الطريق ويتعمل بسهولة و المكان التانى يوفر 51كم ويتعمل برضو بسهولة لانهم بعيد عن الجبل خاصة ان عندنا صخرة هنا لازم يفجرها عشان يقدر يخترق الجبل ويمشى الطريق لكن الاقتراحين التانيين دول طريق بتمر فى سهول و هتوفر ماليا كتير جدا .


قولى … انتم رهبان ؟


– حضرتك شايف ايه ؟


– فى كلام بيشكك فى انكم رهبان ؟


– مبتسم فى هدوء …. اللى رسمنى هو نفس اللى رسم الانبا ابيفانوس أسقف دير ابو مقار


– ممكن توضح ؟


– يعنى ابونا متي المسكن وهو راهب رسم الشخص اللى بقى بقى بعد كده الانبا ابيفانوس ثم الكنيسة ختمتلنا على البطايق الشخصية اننا رهبان و رخصة السيارات كلها باسم دير وادى الريان و اوراق الحكومة اللى معانا والرسمية باسم الدير ورهبان الدير حتى قرارات البابا خارجة باسم فلان او فلان الريانى نسبة للدير …. فلو انا مش راهب ابقى مزور ولو انا مش راهب الكنيسة ازاى ختمتلى او ذكرت اسمى بالريانى ومعلومة احنا بنرهبن الناس زي ما اترهبنا


طب فى حد من قيادات الكنيسة جالكم ؟


– اه طبعا … انبا ابرام اسقف الفيوم جه ورسم رهبان شمامسة و انبا مكاريوس جه وقبلهم كنا تحت رعاية المتنيح انبا ميخائيل اسقف اسيوط


– بس انت عارف أن أبونا متي المسكين له مشاكل مع الكنيسة ؟


– ما هو ده مربط الفرس


– ممكن توضحلى ؟


– مش مهم تفهم دى بس الكل فاهم كويس
حد فيكم فاهم حاجة
– دير اثرى باعتراف الدولة
– وزارة النقل والقوات المسلحة ادت مساحة للاثار لرفع مساحى للمناطق الاثرية
– الدولة متفهمة خوف الرهبان على اثرية المكان و بتدرس الطرق البديلة
– معاهم رقم قومى بيقول انهم رهبان وجالهم اساقفة رسموا منهم شمامسة


-ليه بدل ما نراعى الدير ولو الرهبان عاملين مشاكل مش بنحتويها ؟ ليه الخلاف بيوسع لمجرد انهم من ابناء الاب فلان او الاب علان ؟


– رهبان حافظوا على اثرية مكان لو تم تعميره هيعتبر من اهم الاديرة فى العالم و محطة اثرية هامة فى مصر كلها .
كونوا انتم صوتهم … وضحوا كل الامور
نريد ان نساند مطالب الرهبان بان تختار الدولة طريق جديد بعيد عن الدير وان تهتم الدولة باثرية المكان كأهم كشف اثرى قبطى

 

 

شاهد أيضاً

الحكومة المصرية

الحكومة توافق على إنشاء مؤسستين عقابيتين بمدينة مايو

وافق مجلس الوزراء خلال اجتماعه اليوم برئاسة الدكتور مصطفى مدبولي، على قرار بشأن تخصيص مساحات …