جريدة الأهرام الجديد الكندية 
مقالات مشابهة
قالوا زمان الإحساس نعمة،، يعني تراعي مشاعر غيرك
وإحنا بجــد بقينا نسـتَغـبا ،،،، سر هقولــه بينــي وبينك
صفحة فيس بوكك يا خفيف ،، مش نشـــرة أخبار العيلة
خليك كده واد ذوق ولطيف، وافهم معني كلامـي يا نيلَة
مش أي مُناسبــة تنزلهــا ،،، وتوثقهــا بملـيـون صـورة
في حاجات مش لازم تنشُرها،، خصوصياتك يا شَطورة
لو خَطََبولَك،، أحلي مُفاجأة ،،، مـش لازم صوَّر الأمـورة
والهَبَل إللي بيظهَر فجأة ،،، ماتخلـي حكايتك مَستورَة
في شباب ياما كتير مش لاقية،،تَمَن الدبلَّة عشان مَعذورَة
وبنات فاتها القطر وعديَ ،،، راعــي الأحاسيس المكسـورة
وأنت بتتمَرقَــع ع الأخــر وقـارفنا يومـــاتــي بجولييت
صدقني يا روميو ده مكياج،، امسَحُه يظهرلك عَفريت
منُه لله مــارك أفنـــدي ،،،، ابـتــكــر الفـيـس للحبيبـة
حكمة وعرفتها من غاندي، ( صور النت دي أكبر عيبَة)
والستات العاقلــة الراســـيـه،،،، ليـهـم برضو معـايا عتـاب
جريَ أيه يا وليه أنتي وهيَ،،فاكرين نفسكو لسه شباب؟!
لمي يا حاجة صوَر الماضي واقفلي ياختي يا حلوه الشات
لو كان عايـش عبد الهـادي،، كـان وراكـــــــي يا عطــيــات
وأنتي يا أبلَه يا ست الكل ،، ماكفاية بقي مهرجانات
أما صحـيـح أحـوالكـو تعل ،،كل مناسبة بفديوهات ؟!
عارفين إن الواد إتطــاهـر ،،، ودبحتـم عجــل بآلافات
واتفسَّحتو ف شرم اظاهر ،، الفيديو من اسبوع فات
واتفرجنا كمان ع الفيلا،،، ياختي عليها فيها حمام!!
يوقف حالكم قولو انشاله، في ناس من جوعها بتنام
حسوا بغيركم بقي يا اخوانا، ده كلام مش مكتوب وخلاص
ولا كمان ماتت مشــاعرنا ؟! وما فيش ولا حبة إحساس؟!
ميلاد ثابت إسكندر
فنان تشكيلي
