الثلاثاء , أكتوبر 4 2022

منولوج “تعملى لايك اعملك لايك “

ناصر النوبى
تعملى لايك اعملك لايك
تكتب كومنت اكتب كومنت
وتعلمنى عجين الفلاحة
يا اما اخربلك حجر القداحة
والملاحة الملاحة
وحبيبى خده تفاحة
اعملك لايك
وتعمل فيها فلحوس
وكبير كتاب الأرض وزحل وعطارد
وبلوتو ياكوتوموتو
ومدينى قفاك على البروفايل
اشهر قفا على الفيس
انا فاكر شفت وشك مرة او اتنين
والتالتة كنت هناك فى اخر الكون
عند الحفرة اللى بيوقع منها التيس
وبرج العذراء والقرد المكسوف
من حمار الباك جرواند
واكتبلك كومنت
واعملك شير
تعمل نفسك شاعر الكون
ياخسارة على النفسيات
التعبانة شبه الفيل ابو زلومة
زلومتك فين يا كتكوت البيض
اتصورت مع الدبة سلفى
ومن هذا اليوم مافيش زيك
وكرشك بقى دولى
وياترى جمال الدولى ممكن يكتب ايه عنك على الحيطان
يابراءة فن الجرافيتى
وش محمد محمود الممسوح منه الأه
واه واه على الورد اللى فتح فى الجنة
واه على حب ولا طالش
ينساك الموت
وينسى اصحابك
فى كل حتى اشوفك ياميمون
يا ابو صوت يجيب اكتئاب
والعتبة قزاز
والسلم نايلون نايلون
والكعب العالى يخلى المعزة مثيرة
والمأمأة والتأتأة فلفل حراق
مستمرة ولا سلمية
ولا طعمية وفول نابت
فكرتنى ببل الفول
اصعب الاعمال فى الكون
احضر جردل
وضع فيه ماء اثيوبى
وسد الخرم والفتحات كويس
لو كنت بتستخدم صفيحة
من صفايح السمن البلدى
المهدرج بالنباتين او سمنة نفرتارى
وضع الفول الناشف
فى الماء المعدنى اذا سدوا فى اديس المتاريس ياعتريس يارومانسى
والدبة الدبة وقعت فى البير
والمية فى النملية
ورجل الفيل يا ابرهه الحبشى تنمل
ورجل النملة يا ابرهة تفيل
اغلى قليلا من المفقوعين لجمل يتيم
صبر على الصحرا
والسحتوت والمليم
والقافية تحكم
افتح يا اثيوبى
افتح يا فلفل
افتح يا كوركم
والتانى يقولك حتصحل ثورة ولازم يكون فيها ميكروكروم
واحنا طلبة الطب الملايكة نجيب شاش ابيض
وقطن طويل التيلة ونداوى المصابين فى الميادين
وانت ياسلاح المهندسين تركبوا موتوسيكلات وتاخدوا الضحايا للقصر العينى
واه ياعينى
اه ياليلى على شاف حمص ولا كلش حب واتولع ولاطالش!!
تعملى لايك
اعملك كومنت
تعملى كومنت اعملك كومنت
تهرى وانا اهرى
والناس والفلس ايد واحدة
ايد واحدة
طيب نفسى اعرف الايد التانية فى جيب مين؟؛

شاهد أيضاً

كلمة لا بد منها

فجأة انطلقت الأصوات منددة بتمثال شامبليون بالكوليج دي فرانس الذي يسيئ للحضارة المصرية والمصريين ومطالبة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *