جريدة الأهرام الجديد الكندية
مقالات مشابهة
أنتشرة وبقوة بين الجروبات المسيحية تعليق نيافة الأنبا رافائيل سكرتير المجمع المقدس على مذبحة المنيا لما تحمله
واليكم نصر ماقاله الأنبا رافائيل كالآتي :-
يا مسيحيِّين كفاياكم!
إحنا مش مولودين عشان نموت أو نُستَشهَد ..
إحنا مولودين عشان نعيش للمسيح ونشهَدله ..
مفيش حاجه اسمها [مبروك عليهم] ..
كفاياكم تقليل وتشويه للمشاعر والحزن والألم ..
لو جرَّبتوا تشوفوا أشلاء ولادكم، مش هتقبلوا مُباركة من حَدّ ..
تعزية الله ليكوا في الألم، مسيحيَّة ..
لكن استمتاعكوا بالألم، مازوخيَّة. وتمنِّياتكوا بكلمة [عقبالكوا]، ساديَّة ..
كفاياكم تصديق لنبوَّات كاذبة عن مصر، من سنين ولحد دلوقتي!
سيبوا الدموع تنزل وتغرَّق وشوشكم قُدَّام الله ..
روحوا صارعوا مع الله واسكبوا نفسكوا قُدَّامه ..
روحوا اشتكوله صمته وصبره ..
روحوا قولوله [لماذا تختفي في أزمنة الضيق] مزمور 1:10 ..
روحوا قولوله [انظُر إلى تهديداتهم] أعمال 29:4 ..
لو جُوَّاك غفران حقيقي للقتَلَة، آمين ..
لو مش جوَّاك، متتكسفش تشتكي لله منهم ..
إلهنا حيّ بيعزِّي ويسترد ويخلَّص ..
بس كمان أحيانًا بيسكت ويصمت ويختفي ..
كوننا واثقين فيه في الحالتين، دي حاجة ..
وكوننا مش مبسوطين بصمته وسكوته، دي حاجة تانية ..
محتاجين تدخُّل إلهي يفتح عيون المخدوعين والمُزيَّفين والقاتلين ..
ومحتاجين تعزية إلهية تغمر قلوب المكلومين والثكالى والأيتام ..
متحبسوش دموعكوا، متكتموش حزنكوا، متكبتوش كلماتكوا ..
متخفوش إحباطكوا، متمنعوش شكواكوا، متكابروش في ضعفكوا!
[راحيل تبكي على أولادها وتأبى أن تتعزَّى ..
لأنهم ليسوا بموجودين] نبوَّة إرميا 15:31
